Results

واحدة من الاشياء الجميلة ان يكون عندك صديق يعتمد عليه في امريكا وخاصة لما تكون بتطلب شي من امريكا وتبغاه يوصلك بسرعة .

لكن قمة الندالة انك تستفرد بهذا الصديق لوحدك :[ .

صديقي سراج ، بدء بفكرة او مشروع كان في راسي من زمان انا وياسر متبولي .

قد اكون انا وياسر تراجعنا في تنفيذ الفكرة لعدة اسباب قبل كم سنة ، لكن ماشاء الله عليه سراج بداء فيها وكملها .

وقريب بيعملها موقع مخصوص . او المفروض انه حسب طلبه مني اني اعمله موقع بسيط لتطبيق الفكرة .

الفكرة بكل بساطة ، انه اي احد بيطلب اي شي من الانترنت ، وماعنده بطاقة ائتمان او فيزا .

او اي احد بيطلب اي شيء من الانترنت ويبغاه بسرعة !

او اي احد بيطلب اي شي من الانترنت ومو عارف كيف !

او اي احد بيطلب شيء من الانترنت وخاصة من داخل امريكا وصعب توصل لهنا !

فانا انصحه على طول بـ Mr. Scrooj . اسم الدلع

سراج احد اعز الاصدقاء لي والناس الي اعتمد عليهم كثير .

زي ماقلت لان مستخدم الـMac يحب الخير للناس زي مايحبه لنفسه بشاركم سراج معايا !

سراج انتبه يكبر معاك الموضوع وتحطني تحت بعدين وما تخليني في الـVIP

انا اعرف سراج من فترة طويلة ، اتعرفت عليه عن طريق نادي التميز في منتدى جدة الاقتصادي .

اتذكر اني اول ماقابلت سراج كان شغال في موضوع تزيين السيارات قد يكون تلغيم ، المهم ما شاء الله شغله كان نظيف .

لحد الان هو جالس في دا المجال واتوقع انه اخد وكالة لاحد الشركات .

الجميل في الموضوع ان سراج لسه صغير في العمر وبادىء في الاشياء دي كلها .

بالنظر للبعض في نفس السن ومن الناس الي راحت امريكا مثلا ، الله يستر عليهم بس . ليش نروح بعيد للناس الي جلست هنا اصلا .

انا طالب التايم كابسول من امازون ، لكن لحد الان مافي بضاعة في امازون ، افكر اكنسل من هناك وارجع لسراج ، ممكن يذبحني لانه قلي عن طريقي احسن

على كل حال هذا ايميل سراج حسب كلامه وحسب ماجربت ، انك اذا طلبت شي منه خلال اسبوع يوصلك .
اذا كان في شي بالك تبغاه ، راسله على ايميله واتفق معاه على كل شي .

وحدة من الاشياء المهمة ، اني شفت كمية اكسسوارات للـiPhone عنده ماشفتها في محل ثاني ، وخاصة الاستكرات الي تنضاف فوق الـiPhone .

وحدة من الاشياء المهمة كمان الطلب من ebay صحيح انه الان سار ممكن وزي كده … لكن احيانا يقلك المثل اعطي الخبز خبازه ولو اكل نصه الفكرة انه تريح دماغك خاصة مع البياعيين الموجودين هناك .
انا احس الطلب من ebay تقدم وشي فلة ، لكني اخاف احيانا واحيانا احس الموضوع قروشة مو طبيعية … فموكل سراج فيها .

طبعا احيانا سراج له بعض الاماكن بيجيب منها باسعار حلوة ،، فيطلع السعر مع الشحن ارخص من ارخص محل ف جدة .

الرجال ان شاء الله امين وماراح يضحك عليكم .

اهم اهم اهم اهم
نقطة الـiTunes Card انا دائما اشتريها عن طريقه لانه اسرع طريقة واقل طريقة تكلفه اني احصل الكروت من خلاله وعلى طول حوالة على حسابه واريح نفسي من اني اتحرك من السيارة . طبعا اذا طلبته منه تاخد من ساعة الى عشرة ساعات وتكون عندكم في الايميل . حسب التوقيت والخرابيط دي .