Results

هذه القصة حقيقية . وحدثت معي .

خلال الاسبوع الماضي اشتريت لمبات من محل جنب البيت والمفروض اننا عملاء دائمين عند المحل .
المهم بعد التفصيل والتدقيق باعني الوحدة بخسمة ريال بحكم انها نوع مش موجود ونوع غريب .
الحاصل اخدت حبتين وانا مني مقتنع بكلامه وكمان انا محتاج عشرين حبة .
المهم رحت مع تركي على بنده واحصل الحبة هناك بريال ونص . رحت ساكو واحصل الحبة بريال ونص . رحت ايكيا واحصل الحبة بريالين .
باختصار شديد اكتشتف انه انضحك عليا .

ماعلينا . نقول الرجال يبغى يكسب 100% في الحبة ولانه فاتح في حي مايجيه ناس كثير . على كل ، انا متاكد اني معد راح ارحله ولا راح اخلي اي احد من الجيران يرحله . وناويه بنية مش كويسة .

القصة الثانية ، بائع الموز .
يوم الثلاثاء اشتريت 3 كيلو موز بـ10 ريال من محل قريب من البيت .
امس احصل ابويا يتكلم وزعلان . ويقول الموز سار بـ15 ريال وبيكمل على باقي الاشياء زي العنب واليوسفي …
انا رديت انا اشتريت الموز امس بـ10 ريال .
ويطالع فيا ابويا ويقلي من اية محل . وبدات في وصف المحل ، ويطلع نفس المحل الي اشتريت منه !!!!!

طبعا ما احكيكم شكل ابويا كيف !
المحل هذا ابويا عميل عنده ومايشتري الا من عنده .
انا باختصار وفين وفين لما اروح المحل واشتري حاجة .

بس راح اديكم فائدة صغيرة كده
انا رحت المحل بثوب النوم والفلوس كده في جيبي من غير محفظة .
ابويا مايخرج على بالغترة والدنيا دي كلها .

مايستافد .
لما تروح الحلقة ! اي وحدة فيهم .. ولا بتروح محل الاسعار فيه ماهي مثبتة وظاهرة قدامك .
روح لابس معدوم

لاتثق في ولا محل من المحلات الي موجودة في منطقتك وتقول معرفة .
يبغالك بين فترة وفترة ترسل وجه جديد

طبعا حظ المحل امس انه اتاخر في صلاة العشا كثير مرة ولا الله العالم اش كان سار .