عنوان الموضوع غريب شويا ، لكن الموضوع هذا ينقسم لشقين وفي النهاية كلها مشتركة .
الي مايعرف ، انا درست الابتدائية في مدرسة تحفيظ القران الرابعة الابتدائية .
المدرسة جدا رائعة الحق يقال . لكن سنة من السنين او بالاصح كم مدرس فيها . خلوني اكره اني اكمل المتوسطة في مدرسة تحفيظ قران .
في البداية لازم اقلكم بعض الاشياء الحلوة في المدرسة
الله يذكرهم بالخير ويكتبلهم الخير محل ماكاونوا استاذ صادق الاهدل واستاذ علي :ناسي لقبه :
اتذكر وانا صغير ، كانوا يعملوا شي رائع .
في المفكرة المدرسية كانوا يحطوا تاج في كل يوم تحفظ او في كل يوم تسوي حاجة كويسة .
يحطلك تاج مع نهاية الاسبوع حسبب عدد التيجان تاخد حلاوة وشبس واخر حلاوة .
العقاب لمن لم يحفظ مرة خلال الاسبوع كان يكتب السورة القرانية الي ماحفظها ويجيها الاسبوع التالي ولما يجيبها ياخد حلاوة .
هذا الاسلوب فلة كان يدفعنا دائما للحفظ .
الاستاذ الثاني كان مع كل حصة تجاوب صح لما يسالك على طول حلاوة .
اذا كان درس جديد تجاوب صح تجاوب غلط تاخد حلاوة .
كمان الاسلوب هذا فلة كان دائما يخلينا في تنافس .
العديد من المدرسين في المدرسة مشيوا على نفس النهج .
لكن مدرسين اثنين في ذيك المدرسة خلاص .
المدرس الاول ، فاكر اسمه . مالي غير اقول الله يصلحه ويهديه لنفسه وان شاء الله يكون اتعدل .
وصدقوني اذا كان مستمر بنفس الاسلوب فهو اخد دعاوي لين قال بس .
تخيل وانت جالس تقرا قران فجاة تحصل قربوع !
مع اي غلطة صغيرة كبيرة سواء درس اخده ولا منتى اخده مع اي حركة يمين ولا شمال غلط تحصل قربوع .
حتي لما تقرى صح لكنك ماعملت كويس مرة تحصل قربوع .
لا ازيدكم من الشعر بيت اذا احد اشتاك سواء كان غلطان ولا صح انتم الاثنين قربوع .
كان شعاره قربوع للجميع 
الثاني خلا ابويا يروح المدرسة ويطلب المدير !
تخيلوا ياجماعة الخير واحد كان جايب للفصل الجنان في حجم المصحف . ونوعية المصحف .
في داك الوقت لسه ماكان مصحف الملك فهد منتشر ، كان مجننا الرجال وخلاني اروح كل يوم بمصحف جديد عشان اجيب واحد يعجبه ولا كانه القران مختلف ولا شي .
لدرجة ان والدي لما راح المدرسة قال للمدير انتم متفقين مع مصحف الملك فهد على نسبة معينة !عشان تبيعوا ولا كيف !
طبعا في كل مرة اروح بمصحف غلط كنت انضرب
لاحول ولا قوة الا بالله ! عشان مصحف انضرب !
المهم هذا الكلام قديم ، لكن للاسف لحد الان فيه .
قريب مرة واحد من اصحابي قالي تعال معايا المدرسة اخويا الصغير سارت له مشكلة !
انا بساله اش سار ! قالي ابدا رجع اخويا في يوم البيت يبكي ! انا سالت ليه ! قال انه اخوه انضرب ضرب من المدرس ! ويبغى يعرف ليه !
انا صراحة قلت اكيد الولد دا عمل مصيبة كبيرة !
المهم رحنا المدرسة ! عشان نعرف اش عمل الولد مصيبة كبيرة !
اش رايكم في الموضوع !
واش تتوقعوا عمل الولد الصغير هذا شي عشان يخلي ا لمدرس يضربه الضرب هذا !
ذكريات المدرسة
،،
) صادفت منهم كثير ،،
يا حبي للنوع الاول من مدرسيك ،،
خلال مسيرتي التعليمية ( حلوة الكلمة
والنوع الثاني
،،
للأسف يخربوا علي حلاوة النوع الأول ،،
بس الحمد لله قليل ،،
وانتوا كنتو حلاوة في حلاوة
،،
اما مدرسك الثاني الي يضرب بسبب المصحف :s ،،
أنا أفكر في نفسي أن هالنوعيات مية بالمية فيها مرض نفسي ،،
أحس ردي أطول من موضوعك
،،
تحية ،،
في هذا الزمن …
أتوقع أن المدرس ضرب أخو صديقك …… (دفاعاً عن النفس) … فقط!!!!!!!!!
دراستي الابتدائية تلخصت في سنه أول ابتدائي حيث اني درستها في جدة وفي مدرسة اقل ماتوصف به بأنها رااائعه .. اسلوب المعلمين رائع .. المكافآت بكل الطرق لدرجه افلام الفيديو كنا نتفرج افلام كرتون وغيره وغيره : )
: ( بعد مانقلت من جدة لمنطقة ” اتحفظ على اسمها ” كرهت المدرسة اصبحت اسوء من اهل المنطقة نفسها اخذت صفاتهم السيئة وزدت عليها من عندي .. المدرسين سيئين وليسوا الكل الحق يقال لكن كان في مجموعة منهم ينفعون يديرون سجون بكفاءه عاليه :p
تعرضنا لجميع فنون الضرب : ) وللأسف ماكان شيء يشفعلي لأني ماكنت اذاكر تمام بسبب كرهي للمدرسه بالتالي درجات متدنيه وبالتالي ماكان والدي يصدق اني انضرب بغير وجه حق الا بعد كم سنه وبعد ماشاف تغير في اخلاقي ووو
في المتوسط تغير الحال : ) وتغير كل شيء لم يمر علي مدرس سيء والحمد لله
عموما مهنه التعليم نفسها فن وملكه ،، ولا ألوم المعلمين اللي مايقوموا بواجبهم على اكمل وجهه .. بسبب رواتبهم الضائعه .. كل يوم الجرايد صراع المعلمين مع وزارة التربيه والتعليم من اجل المستويات وتحسينها …
بالنسبه لأخ زميلك .. اعتقد انضرب عشان شاغب
والله ياملياني فكرتني بأيام زمان ..
أول شي الحمد لله مدارس التحفيظ فيها نوع من التجديد وأشياء حلوة يحببوا فيها الطلاب , أبدا ماادافع بس دا الشي من واقعي الين مااتخرجت كان في نوعية طيبة وان كان في البطال ..
المدرس اللي شفته مرة يعصب وزي ماقلت ان شاء الله يكون اتعدل ..بس حكاية القرموع دي شكلها هيا اللي خلتك عبقري في التقنية ماشاء الله
بالنسبة للمصاحف غريبة اصلايخليكم تجيبوا زيها اللي افتكره كنا بربع ياسين نمشي الين الصفوف المتقدمة شوية ..
الطالب اتوقع زي العادة نسي شي ولا عمل شقاوة شويتين مو اكثر .. وفي مدرسين الله يهديهم بدا المستوى
افتكر مرة وانا في الابتدائي المدرسة اعطتني بطرف الكتاب على راسي << ماسكتلها عملتلها مشكلة ..
ومن جد اللي ماله خلق يتعامل مع طلاب يسيب التدريس احسن ولا يروح لطلاب كبار .. ولا يجلس يسوي كدا فيهم ..
خلاص مرة طولت ..
وانا اقول
اتاري الحلويات هيا السبب
المهم
مليان مدرسين عندهم حالات نفسية مستعصية
بنفسي رحت لمدرسة أخوية قبل كم سنة لأنه انضرب بدون سبب يمكن حتى شمه
واذكر نفسي ايضاً ممارسات ارهابية ايام الطفولة لاسيما مايصيب بعض زملائي
اه يامحمد خليت ايش ولا ايش
احسن مرحلة دراسية مريت فيها اظن المتوسطة. نسبة كبيرة من الاساتذة كانوا ممتازين جدا اخلاقاً و علماً حتى البشاشه و حسن التعامل تجده عندهم
الله يذكرهم بالخير
ذكريات
أذكر مدرس العلوم في إبتدائي ، كان يعطينا ملخص نحفظة و نجي نسمع له ..
وإذا أحد غلط ، كان يضربه بكيبل البنيان (البرتقالي) الى أن تصير يده حمره و وتظهر نقاط سودا فيها …
ومره أكلت ضرب في اول إبتدائي ، على حاجه تافهه أذكر …
لكن أعتقد أ الوضع قام يتعدل هذي الأيام ،،
محمد ماحبيتها من الحلويات ،،، المكافئات الماليه هيا الا كانت عاجبتك
كنّا نسميه قرموع .. بالميم .. إنتو تقولو له قربوع بالباء ؟