طيب يا جماعة الخير … انا بكتب هذه التدوينة … لان وصلت معايا من الجامعة .
قبل فترة من الزمن سار معايا موقف رفضت اني اتكلم عنه لكن احداث اخيرة خلاص بكتب معد سار يفرق معايا الحوش ! نعم انه حوش وليس جامعة …
الحكومة ماقصرت وانا احلف انها ماقصرت بدفع مبالغ طائلة للجامعة وكبيرة لكن فيه مشكلة المبالغ بتختفي !
سبحان الله يترسل المبلغ من الرياض ١٠٠ الف ريال ويوصل ٥٠ الف ريال سعودي ! كيف ما اعرف .
ما علينا في الشي هذا … انا بحكيكم عن قصة جميلة سارت معايا .
العام الماضي قررت الجامعة اقامة ملتقى الموهوبين الاول على مستوى التعليم العالي في الجامعة .
نبغى نعمل بطاقات تكون بشكل جميل … شفنا اسعار الطابعات غالية … فانا تكفلت اني اشوف محل واطبعها بسعر رخيص جدا …
دفعت الفلوس من جيبي … وقلت لهم ياجماعة الخير الطابعة هذه طابعة شخصية حقت واحد ما اقدر اجيب فاتورة …
قالوا مش مشكلة اطبع وبعدين نتفاهم … طبعت وجا وقت الحساب .
يا جماعة الخير فلوسي … جيب فاتورة … لا اله الا الله !
المهم .. قلت لهم انا ممكن اجيب فاتورة من مؤسسة اخويا … عادي تمشي !
الموظف المسؤول عن الفلوس …
اسمع ابغاك في موضوع …
انا طيب …
هلا خير ان شاء الله …
محمد … تقدر تخلي الفاتورة بمبلغ عشرين الف ريال !
انا ها ! نعم ! كيف !
لا لا تفهمني غلط اصلوا الشباب كانوا يشتروا اشياء كثير ومايجيبوا فواتير ! فعشان كده راح تخدمنا وتخدم المركز انك تخلي الفاتورة بعشرين الف ريال !
ها كيف ليش ! لا انا مالي صلاح !
هذه مسؤولية انا ما اتحملها !
مؤسسة اخوك حتستفيد انها اشتغلت مع الجامعة وخطاب شكر وزي كده !
انا لا ابدا … ما اعملها استغفر الله … بس فاتورتي وماليا صلاح بالباقي …
طيب خلاص جيب فاتورتك …
المهم … كل ما اروح اقابله عشان الفاتورة … ما اقدر احصل عليه وادق انواع الصففان … ويعدي على الموضوع ستة شهور ولا ثمانية شهور …
المهم … وصلت للدكتور ابراهيم علوي جزاه الله خير عن طريق واحد من الشباب … واخد الفاتورة مني ودفع المبلغ ليا وقلي هوه يتفاهم مع الجامعة وقال … كفاية انه هوه بيتعذب وبينظلم ما يبغى واحد ثاني ينظلم معاه !
بين الحديث … رحت في مرة وحصلت الي طلب مني الفاتورة ام عشرين الف … واتكلمت معاه …
قالي الفاتورة دي ما تصلح … مهي تمام ما نقبلها في الجامعة هنا … لازم تغيرها !
وبعدين قالي ياخي تبخل على الجامعة بمبلغ ثلاث الاف ريال … ودخلنا في نقاش طويل … له وقت ثاني كتابته …
المهم الان … انا بسال سؤال من نلوم !
هل الحكومة ما بتدفع فلوس للجامعة !
ابدا هذا الكلام غير صحيح في مبالغ كثير بتروح للجامعة ! لكن السؤال المهم فين بتروح وكيف تتصرف !
واحدة من القضايا المشهورة … قضية صيانة مكيفات الجامعة ! واحدة من القضايا قضية عمائر المدينة ! واحدة من القضايا قضية التلفيات للعفش ! وغيرها الكثير !
الموضوع الثاني الي بتكلم عنه … وراح يكون الاسبوع القادم !
والدي … دكتور في الجامعة … خدم الجامعة اكثر من 30 سنة … الان شغال معاها بنظام العقود … لو احكيكم المهزلة الي بتسير فيه …
وسببها ايش … بنود الجامعة غير واضحة وكل واحد يفسرها بكيفه ..
لا تعليق
كلمه هي كل التعليق احيانا!
محمد: هادا غيض من فيض من الي بيحصل في القطاعات الحكومية عموماً، وياريت الي عندو تجربة زي محمد يسمعنا اياها، واتمنى انو الكل يكونوا زي محمد في موقفه وحتى لو وصل الامر للشكوى والاعتراض.
المشكلة في البلد ماحتنحل طول مافيه اشخاص استغلاليين، من اصغر موظف لاكبر مسئول. ياجماعة البلد حتروح من بين ايادينا ونحن نتفرج، لازم نقوم كلنا عشان نلحق نصلح الي اتخرب. بالفعل يامحمد، وهي ماهي كلمة نفاق او مجاملة: الحكومة مابتقصر في مواضيع كثير، بس الخلل من الي تحت والي بينهبوا خير البلد.
اللهم اصلح الاحوال والعباد.
الله يهديك يا محمد لو سويت الفاتورة بعشرين ألف بتمشي بس ثلاث ألاف ما تمشي!
لو كنت مكانك كان قلت للشخص إلي طلب الفاتورة بعشرين ألف طيب نعمل لك فاتورة بعشرين ألف وتروح على طول للشرطة وتبلغهم وهم يتصرفون ويوقفوا كل حرامي عن حده. بس السكوت ما ينفع.
صحيح زي ما قال قشماق، هذا غيض من فيض… و ما خفي كان أعظم….
ما شاء الله شايف الـ Wish List شغالة
فعلاً الوضع مزري جداً من ناحية الميزانية .
كنت في نقاش مع مديرتي .. بخصوص أجهزة كمبيوتر IBM قديمة اتوفرت لهم قبل حوالي 3 أو 5 سنوات..
فـ أقترحت عليها بما أنو الي بيشتغلوا عالاجهزة اغلبهم طالبات ( انا في النشاط ) وكل واحدة فيهم ما همها تشيّك على الفلاش ميموري تبعها أو تكون ما عندها خبرة من ناحية الفيروسات والهبل هذا بالاضافة إلى أنو زي منت عارف النظام ويندوز ويحتاج حماية ( أوعك تقول ماك هه D: ) فاقترحت عليها ليش ما تستفيد من وجود هالأجهزة وتستخدم اللينكس بدل الويندوز فقالت لي والله يا بنتي ما عندي مانع بس المشكلة مو هنا، المشكلة هل حيعرفوا يشتغلوا عاللينكس.. أخذنا النقاش حتى وصلنا بالنهاية إلى أنو حرام هذي الاجهزة تتحط في مستودعات الرجيع ولا يستفاد منها .. فـ فاجأتني بالخبر الأشنع: ( أحمدي ربك يا بنتي هذي الاجهزة استخدمناها .. فيه أجهزة جديدة زيها وأثاث جديد من 7 سنوات وأثاث مكتبي كثير جديد في المستودعات ولا استفدنا منه )
أما الميزانية فحدث ولا حرج.. كثير بيصرفوا من جيبهم على هالأمور.. تقول بيصرفوا عالجامعة مو الجاعة اللي بتصرف عليهم .
أنا وصلت لقناعة حقيقي .. إذا أنت مسمّيها الحوش.. فأنا مسميتها الشّحاتين !!!
والله قصة خطيره
و حاجه من جد تخوف يعنى دا إللي طلب منك فاتورة العشرين ما يخاق ياكل مال حرام ؟؟؟
سبحان الله
اسرق رغيفين .. تصير المجرم السارق
اسرق ملايين .. تصير الماجد الحاذق
(للشاعر / عبدالرحمن بن مساعد )
المشكله فينا احنا …
الكل صار جريئ ووقح … والكل صار يقدر يسرق … لأنه مافيييييييييييه نظام في هالديره … فانتقل الداء الى الجامعات …
وبعدين حنا شعب خواف … مانعرف نشتكي رسمياً … ولا زي هذا صاحبك مفروض ترسل إسمه للجنه اللي ماسمعنا عنها اي شئ من يوم تأسست … لجنة مكافحة الفساد
اعتقد ان المسؤول الوخيد في هالموضوع اللي انصرف عليه ميزانية الجامعات سواء مدراء الجامعات او رئيس التعليم العالي و حتى وزير التربية برااااسه هم المسؤولين بشكل مباشر عن صرف المبالغ الضخمة السنوية من قبل الحكوووووووومه..سؤال بديهي وين تروحي؟َ! اكيد في بطووونهم..[س مين اللي راح يحاسبهم؟ اكيد مو انت ولا أنا
ربنا فوووووق…
محمد .. الصغير شاف الكبير يسرق فاتعلم منو