في كل عام ولله الحمد ، اذهب مع عائلتي في رمضان في اول عشرة ايام ، وذلك لخفة الزحام فيها ، لاداء مناسك العمرة ، وجرت العادة ان نذهب في وسط الاسبوع ، لكن هذا العام ، لعدة ظروف
كتبها الله لنا اليوم الخميس .
كعادتي في استعجال اهلي ، اتفقت معهم بان نتحرك من المنزل الساعة الواحدة والنصف ، وطبعا اشكر الله اننا خرجنا الساعة الثانية والنصف .
طبعا في الطريق لمكة ، كنت افكر ، في شعوري عند رؤية للكعبة ، واتذكر ذلك الشعور الذي اشعر به في كل مرة اراها وكاني اراها لاول مرة في حياتي .
طبعا في السيارة ، مافي غيري رجل والبقية اختي الصغرى والكبرى امي حفظها الله ، وابنة اختي والخادمة لدينا .
طبعا في كل عام ادخل مكة في رمضان كاني ادخلها لاول مرة ، ففي كل عام تنظيم جديد ، الحمدلله موبايلي ماقصرت وحطت لوحات ارشادية كثير جلست ادعيلهم طول الخط .
المهم وصلنا مواقف كدي ، وجرت العادة اوقف في منطقة ، اصدم انو سار ممنوع الوقوف فيها ، فوقتها قلت امسك نفسك يامحمد ، محرم وصايم ، وخلينا نمشى مع العساكر ، يبغوا ينظموا الزحمة مساكين .
المهم سمعت كلامهم لابارك الله فيهم ، ورحت محل ماقالوا ووقفت السيارة في مكان ومشيت مع اهلي مشي لين الباصات ، الحمدلله كل شي باجروا .
وصلنا الحرم ، عفوا ، نفق مشينا فيه شويا ، وطلعنا سلم كهربائي ، وصلنا الحرم .
الله ، مافي اجمل من منظر ماذن الحمر ، والناس وهيا ماشية ، وكل واحد رايح للحرم ، وصلنا الباب ، باب الملك عبدالعزيز طيب الله ثراه .
اول ماوصلنا قامت صلاة العصر . والحمدلله صليت وان شاء الله صلاتي تقبل ، نص السجدات ، معرف كيف سجدتها ، لكن سبحان الله بالفعل سبحان الله مع كل ركعة اركعها ، تزيد المساحة الي انا فيها ، كيف ما اعرف لين اخر ركعة وصلت ، حسيت ببرحة عظيمة .
المهم بعد صلاة العصر ، شفنا جنازة واهل الجنازة مهم عارفين يمشوا ويوصلوا ، لين الناس بعدولهم وصلوا .
دخلنا لمنطقة الصحن ، ومنظر الكعبة بحلتها السوداء ، وانا اتذكر الموقف ، حسيت برعشة في جسمي ، ودمعت عيوني ، فما اقدر اوصف شعوري لما شفتها .
بدينا العمرة والحمدلله .
طبعا الشي الوحيد الي ضايقني في الطواف ، جهل بعض الناس الله يصلحهم ، كل مانوصل بين الركن اليماني والحجر الاسود ، نحصل زحمة مهي طبيعية الناس ، توقف بموازة الحجر وتكبر وتسير زحمة ، والمفروض وانت ماشي تكبر عشان لاتسوي زحمة ، بس الحمدلله .
طبعا رغم الحر الشديد والشمس ، الا انو مع نهاية كل شوط تجي نفحة هوا باردة تبرد علينا ، بنت اختي الصغيرة ، طبعا مع الشوط الثالث ، بدات بتعبت خلاص ، الله يحفظها عمرها ٨ سنين وصايمة .
طبعا كل مايقرب المغرب الزحام يزيد ، خلصنا الطواف ، ورحنا صلينا ركعتين بعد الطواف ، وبدينا السعي ، وصلنا الشوط الخامس واذن المغرب ، طبعا ، الناس من قبل الاذان ، بدات تجلس في المسعى ، وتضايق المعتمرين ، الحمدلله ، شربت واهلي زمزم ، وصلينا المغرب ، وان شاء الله صلاة المغرب تقبل ، نفس صلاة العصر ونفس الوسع كان يسير مع كل ركعة .
بديت اكمل السعي مع اهلي ، وطول ما انا ماشي سرت اقول حسبي الله ولاحول ولاقوة الا بالله ، مادري كيف الناس هذي ماتخاف الله ، ياكلو التمر ويرمو البذر على الارض ويستخدمو المناديل ويرمو المناديل على الارض
يشربوا القهوة ويكبوا على الارض ، وسار المسعى ، غير نظيف تمام ، رغم انو في زبايل كثير ، لكن الواحد اش يسوي واش يقول .
خلصنا السعي وبديت ادور على امي الله يحفظها لانها ركبت عربية مع بنت اختي ، والحمدلله حصلناها محل ما اتفقنا ، وكانت من غير جوال ، بس واحد ابن حلال شافاها تايهة اعطاها جوالو .
خلصنا العمرة . طبعا الكل تعبان مع الازدحام الي كان يزيد مع اقتراب المغرب ، واقتراب العشاء .
الحمدلله . حصلنا واحد ابن حلال من اهل مكة الطيبين ، وصلنا للسيارة بي ٦٠ ريال ، يعني اخد على النفر عشرة ريال ، وهو عندو باص ، ممكن يحمل اكثر ، لكن لاني قلتلو عيلة ، قلي خلاص ما اركب احد .
وصلنا جدة و اهو بكتب الموضوع .
طبعا في حاجة ماقلتها ، لما كنت اسال العساكر عن ارشادات ، ولما وقفت في المواقف واسالهم عن الباصات تجي محل ماوقفت ولا لا .
يقولوا ماندي ، روح اسال وشوف بنفسك .
بلاش اكمل كلام فيهم واخسر الاجر ، الله يسامحهم بس .
الحمد لله عالسلامه وجعلها الله في ميزان حسناتك
تقبل الله ياباشا. :D.
انا طالع الأحد ان شاء الله مع الأهل.
esraa
الله يسلمك ان شاء الله ، امين يارب
Ala7lam
منا ومنكم ان شاء الله . والله يسرها لك .