صراحة كل مايسعني التفكير فيه حاليا هو المستخدمين الجداد في الماك بمعني اخر حديثي العهد بالماك
وهذا الموضوع موجه لهم اكثر من غيرهم فالبتاكيد المستخدمين القدام لن تنطلي عليهم الحيلة .
صراحة مني عارف اش قول ولا اش اكتب
لان الموضوع مهزلة شديدة جدا
واعتقد اني راح اشتكي لابل يمكن تتوقف هذه المهزلة ، يعني مادري هل المشكلة من ابل بريطانيا ومستخفين بالعرب وشايفينهم عالم هبل
ولا الطمع والشجع لدى التجار العرب
لولا اني في مكان متاكد من ان رواده محترمين كان سبيت سب لين ماقلت بس .
—————————
واحد من دائرة المعارف
اشترى اخيرا ماك بوك برو من وكيل ابل في الشرق الاوسط ، وعلى حسب كلاموا اخيرا ، لانو ماكان متوفر عندهم ، المهم لما سالتو بالاسلوب هذا (يامشفط ياتعبان ليش ماخدت من المحل الي في طريق المدينة ! ) قال ياخي ابغا كيبورد عربي اصلي ، ردي بكل بساطة كان ، (خلي ينفعك !!)
المهم الي سار اول شي الكيبورد يولع في الظلام مع الحروف العربية ، قلت تمام ، الحمدلله طلع في كيبورد عربي اصلي ،
ثاني شي دخلت خصائص الجهاز كنت متوقع الاقي ٢ جيجا هيرتز على اقل تقدير وانا واثق ١٠٠٪
افاجئ والاقي ١.٨٣
(وقتها انجيت ، يابويا مايسير الكلام هذا ، اش البهللة هادي اش السرقة دي ، ……….. )
فرحانين الافندية بالماك بوك برو الاصدار الاول
والحمدلله الاصدار الاول من الاجهزة فيه مشكلة حرارة
ويمكن ابسط شي مشكلة البطارية الي اعلنت عنها ابل ،
وهذا المشاكل حلت مع الاصدارات الجديدة من ابل وحسب علمي ١.٨٣ قديم جدا
هنا في جدة بطلوا يبيعوا من زمان (طبعا اتحدث عن محل واحد اعلانوا حذف من المنتدى فماراح اذكروا)
———————–
يعني صراحة مهزلة كبيرة جدا . الموضوع هذا
المهم الموضوع هذا انا بكتبوا ، للتنويه
لما يجي احد يشتري جهاز ماك بوك برو
يتاكد من الاصدار انو جديد
ومافي مشاكل
وابدا لاحد ياخذ ال ١.٨٣ جيجا هيرتز
لانو مافي اصدار جديد منو في الماك بوك برو
———————–
من باب زيادة المعلومية
يعني
برى الماك بوك برو ١.٨٣ في الوقت الحاي في حالة ان بعض المحلات لسع عندها جديد سعرو نزل كثييييير
أنا من مشجعي الكيبورد العربي المذكور أعلاه ..
لكن ما حتمشي عليا حيل الوكلاء عشان يصرفوا أجهزتهم القديمة …
ضروري لمن واحد ما يفهم في جديد الماك يروح يشتري جهاز يكون معاه واحد فاهم عشان ما يسير له إللي صار …
غير كده مجنون إللي يشتري ماك اليوم مثلاً .. و بعد ثلاث أيام في كينوت جديدة و منتجات جديدة أو مطورة …
بس إذا ما أحد قال له .. المسكين ما حيدري و يشتري و بعد يومين يلاقي إنه نزل موديل أجد من الجهاز إللي معاه …
الجديد في الماك يحتاج إلى hints كثيرة بخصوص هذه الأشياء …
والله انا ماتفرق معايا كثير
الين دحين الكيبورد حقي انجليزي ماعربتو
لكن ترى الكيبورد المذكور اعلاه مااطيقوا مرة لان كيبورد اوربا
انا مشجعي كيبورد امريكا
كيبورد اوربا لان في لغة الحروف فيها اكثر مصغرين الحروف ومزودين ازارير والانتر متخلف شويا فيها
كيبورد امريكا في المقابل الحروف اكبر والانتر اكثر واقعية
——————
يعمي اش تقول عليه الله يهديه
رغم انو ماخاب من استشار
طيب كيف الواحد يعرف ان اصدار جهازه جديد ؟
[...]صراحة كل مايسعني التفكير فيه حاليا هو المستخدمين الجداد في الماك بمعني اخر حديثي العهد[...]
طيب يا أخوي أنت تنصح كذا تنصح الواحد يشتري من السعودية أو من برا؟ من اللي ينصب على التاني …. معليش بس ما فهمت الحكاية بالكامل؟
شكرا
انا انصح بالشراء من السعودية من اجل عملية الضمان ، وخاصة للمستخدمين الجدد ، لكن للاسف ما انصح بالشراء من اي محل ، لان في بعض المحلات الاسعار عندهم مبالغ فيها جدا جدا ، وفي بعض المحلات زي ماذكرت بالاعلى يبيعوا اصدارات قديمة على انها جديدة للمستخدمين ، هذا كل مافي الموضوع .
.
في المقابل في محلات ستجد الاصدرات الجديدة من اجهزة ابل وباسعار معقولة ، لكن الكيبورد سيكون معرب بمعنى اخر الحروف الانجليزية ستضيء في الظلام لكن العربية لا .
اذا عزمت على شراء جهاز من ابل ، وانت مستخدم جديد كل ماعليك فعله هو الاستشارة فقط
شكرا على الرد …طيب ممكن لو تكرمت تديني أسماء المحلات في السعودية وأرقامها وعناوينها على الانترنت عشان نعمل مقارنة بين الاسعار.
شكرا